رحاب الزجل





من رحاب الزجل اخترنا لكم بعض القصائد

 

"  مراية الروح " للزجال ادريس الزاوي

" بغيت نفوت لهيه  " للزجال الميلودي العياشي

"اش نكون ف ملك هاذ الحروف" للزجالة مليكة امصاد

 " سفر الرؤيا  " للزجال يونس تهوش



الزجال ادريس الزاوي



 

قصيدة " مراية الروح "

إيلا كانت الكيَّه ف الـﭭلب زاندَه
ع لوجه يبان دخّانها
لوذن حاضرَه
والعين ما هي راﭬـدَه

واش الشاعلَه فيه
بحال اللي تيسخن عليها ؟

اعطيني وذنيك ، استلغى لولهتي
عفـــــــــاك
راني ف شوفه منك طامع
خليني نسمعك على اوتار ضليعاتي
تزنزين خطيوات الدالع
ف اسواق راسي دالع دايع
ف اسواق الدنيا ، ماني شاري ماني بايع
بحال شي بنادم غادي عادي
ما نأدي ما نحاذي
نصبـح هابـــط
نمسي طالــع
بحال اليوم اللول
بحال السابع



ف قفص ذاتي مسجون
بين سواري الكــاف و النون
فيضت النيَّه غطاتني الغبشيَّه
طحت مع راسي نتشارع
نتلاوح بين البارد و السخون
لفكار ما لقات راحه فين تكون
يا ما جراح الروح دمات
و أنا بارك عليها ب الترقاع
واحد من سلالة بني غفلون
ف قشور ليام راتع

هرتــني نفســي
حسي مســي
أي يا يــاي
يا حريـﭫ السؤال
شكون أنا ؟ أنا شكون ؟
ما حد الشوفه تتبهات
نور لبصر تيقلال
ف ربيع لعمر نوارة الروح تتذبال
بصريط غنان وطريد الدخان
السلسول سكَّه
لعروق طرﭬـان
هكاك نِّيتْ معاكس الريح
نبرِّي على عنوان .

ما حد النظره تتحرار
الخاطر تيضياق
ف الـﭬـلب شحال من مسمار
عاطي راسو للتطراق
ساعفيني غير مرَّه يا صورتي
طلـﭬـي اللسان
ب الشهـــاده يبـــــوح
ياك لوجه مراية الروح
و الروح يمكن تشهق
ف أي ساعه و تروح

باهتَه
يا سيفتي ف مرايتي
م الـﭬنه للفركوح
كادر لعظام تابوتي
ما فيَّ غ ﭬـلب يزدح
بغرام الكلمه مجروح

يـاك آ لكلمه يــاك
وخا وقفت ركيباتي
وخا بدلت كساتي
وخا عوجت الشوفه ف مرايتي
ما بقى ف السر ما يتخزن
بين الشن والطن ف حال مطنطن
بوزلوم ... شقيقه و لا بومزوي
وخا بردت كيتي
وخا داريت ليعتي
وخا طويت صورتي
مع وريقات المخزن
ف بزطام لاوي
مبرع ب الشيك ،
شيك لبيك
طلع لحساب خاوي

آ آ آ آ ه على ايام مشت م لعمر
آحْ من اوقات جات
ف ذاتي تنــــجر
وأنا نصبر الليعات ب حساب الشهر
عام يلوحني لعام
و أنا غادي ع لوهام
نتشعبط ف تليس لحلام
نجرجر خطيواتي ف طرﭬـان
كلها تلاوي
نـﭬدي اوقاتي ف دنيا
مخبلَه ب التْناوي

شكيت ف ناسي
تنويت حتى من راسي
ف دكوك القهوه طمست قرايتي
تسحليت السؤال يسخسخ ف حالتي
حتى خفات علي صورتي ف مرايتي
إيوا شكون أنا ؟
أنا شكون ؟

أي يا يـاي مزود الضر ثقال
عييت وطبت ب التسوال
النيف بلع دخان الشهقه على الريق
العين ﭬـالت للمخ خلاص فيق
فرَّكت حموم الشوفهﭬـلت نشــــوف
نروي عطش النفس الملهوفَه
يبرد الجوف
أي يا يـاي آش يعجب الـﭬـلب
فيما يشوف
بين الكسوف و الخسوف
شمس الحق منتوفَه
ب نبال لغدر مقدوفَه

أي يايـاي هذ الزمان آش تحت راسو ؟
كلها يـﭬـول راسي
و انا شكون آ راسي ؟
شربني هوس الحال
سقاني تخت كاسو
زند نار اهواسي
علاش و كيفاش
هذ لمرايه لابسَه الطشاش ؟؟؟
الضحكه صفرا والنيَّه ما تماش
حتى لين
يا الراس العاصي
و انت ف سراب الوقت عطاش ؟؟؟

سرحت الشوفَه ف الدواخل ﭬـلت نشوف
دبت الروح ف رموش العين
غمزتني عيني ف مرايتي
شفت كفي
بانت لي بيضا
محها حروف
سرَّجت عقلي
ف شعاب الخاطر نبات تنطوف
نتحسس خطيوات الموري ف سكات الليله
نفتش على حرف عزري
تكون له الورقه خليله


غمزَه هي ف حلال
نغزَه هي من عين الحال
طلـﭬـت سراح الروح
ف قراية وجه الحاله
ساحت هذ الروح
مرَّه تسها ف شون الخاطر
تسيــــح ... تسيـــــــــح

مرَّه تصحا ب الحرف تسافر
تصيـح ف وجه الـــريح
تـصيــح
عليكم تصيـــــــح

يا حاسيينها فينا
محنه على الدوام
يا ناكرين الدم
يا نادسين ملح الطعام
يا قاريينها عوجا
يا محرفين لكلام
يا مخوضين ترابينا
را العـــــيب فينا
زايد يكبر عام على عام
و حنا مدرﭬــين وجوهنا بغمام
معلقين الرجا ب اوهـــــــام
ويزيد العيب يكبر و يكبر فينا
عام على عامتيفلت 1988

الزجال الميلودي العياشي

قصيدة " بغيت نفوت لهيه "

ساعفني

... يا قلبي
نبدَّل دمّك
بالما نحقق دقاتك
علْ ساعة خاطري
نتْهنّى
نْطيرْ خْفيف بجناحْ
صنعته من ريش شوفتي
وعظام ايّام فْ بالي مدفونة
ما تبلىَ
  ساعفني نعطيك رجلين نزرع ليك قلب و يدّين
تجاريني ف الهربة
ما تعيىَ

نعوّلْ عليكْ طول العگبة ما نخاف عليك توقف ولا تجيك جلطة
أنا مسافر بعيد

... بْعيدْ
فوق سنين الضو
نجني من شجرة اليقين
بْصر لعيني الثالثة
بغيتك تكون قد السفرة
ما تشيبْ ما تحْرن
نوصْلو ساروت
الباب المسدود
هدِي قرون
فينا تْجْلى
نعسوُّ على لفجرْ
حتى ّ يفتحْ انْواره
الگمرة تكون جْواره
النجوم شاهدة تنظرْ
عادْ نحفرُو لليل
قبرْ .



الزجالة مليكة امصاد



قصيدة " اش نكون ف ملك هاذ الحروف "

نَكَّسْتْ عْلَام هاذْ الذات                      

وبلا شْوارْ تْسلّيت لـِيَّاسِي                       

نَنْفَضْ من تْرابْ هاذ الوجهْ                      

هاذ النّفسْ المْغَرْباني فْ دواخل راسي

طلّيت من شقْ هاذ الذات

وهاني...

قلبي ما هاني...

ننْفَضْ هاذ النفس مَنْ كْذا عَلّاتْ

وما هي... غير خاطري..

إلا بغات ...

نغزل من خيالي بسمة

ننسج ف بالي كلمة

نَطْلَعْ مْعَ شرْقة الصباح

نلقى سكاتي فيَّ داوي

وخيط الفرح في مساوي

نهجَّجْ حروف التسوال

بين البارح واليوم

نابت شحال من سؤال

ضو شاعل ، ضو مشعول

وشحال من ضو...طافي ف البال

يقلب على غزيل لمعاني

وماشي بعيد لمعنى إلا بغاني

الحرف يخاصم ظلامه

ويمكن غذا... يولّي مشعول

ومن غرق ظلامي

يشعل ضوْ كلامي

علمني...

علمني نكون خيط من عين الشمس

علمني نكون... كيف نكون

علمني... وشمني طريق للاقلام

نسْرحْ الحروف ف كديَة الاحلام

ندفن عْنادْ هاذ المداد

نخَرَّجْ سَرْ الكاين و المكنون

علمني...

علمني نكون دراز

نرقَّعْ الطريق للأحلام

تقراني...و إلا الحرف بغاني

راني نقرا... سر الحكمة

وشرقة الكلمة من الظلمة

وسرالعطش من فيض الما

علمني...

علمني نكون حداد

نْقَطّعْ وْ نْلاقي ...

سر جوابي ف حدود التسوال

علمني...

علمني كيف نقطر من النور هاذ النور

قطرة لي...قطرة علي

و قطرة على قطرة

نلقاني فلك ...

وحروفي نجوم...

ف وسط راسي ...شاعلة نور

علمني...

علمني نكون... كيف نكون

مْتَكِّي على خْدودْ الصبر

داوي مع جراحي بالجهر

و نعلمني ...كيف تعلمني

نخْلقْ من غرق اوجاعي

ضحكة خارجة من عمق الاعماق

و من عمق هاذ النظر

الا راكَبْ عليَّ هاذ المعنى

بمْحَنَّةْ الحروف و الصبر

و ياك انا و هاذ الذات

ف مْدَجَّةْ هاذ الحياة

غير خيوط ...وجامعانا حبة حبة

و ايلا شفتوني ساكت... صحة و سلام

طيحوا الدواية

علقوا القلم

اعلم الله ، حيث انا ...

علمتني و انا كبير...

وجَّدْتْني لكبري و انا صغير

نْفَهَّمْ افهامتي...

و من صغري... وانا مْبرَّكْنِي قْبالْتِي

نوريني طريقي و نتعلم

و انتمَ... قولوا  الله و اعلم

آش يكون ...

اش يكون كاع... هاذ القلم ف ملك المعنى

ايلا ما ضوَّات... حروفه عل الاوراق

واش تكون هاذ الحروف... فْ ملك الاوراق

ايلا ما قَلْباتْ... الشوفة العاقْلة احْماقْ

رَسْمَتْ خَدّ الدّوايَة اشْواقْ...

وْطَرْزَاتُه مَعْنى ...

الدار البيضاء اكتوبر 2011



الزجال يونس تهوش

قصيدة " سفر الرؤيا "

تْبسّم التراب للما(ء) .. فاحت الكبدة ازهار
غمز الهوا للنار.. نوّارتي ما عليها اخبار

غمّض الظلام عينيه و حَلْ فمّو.. فتح النور عينيه و سد فمّو..
تفوّه الفجر على قد فهمو:

بين شرقة و برقة... تخايلات له الاكباد معانقة
بين رعدة و سهدة... توهمات له القلوب معاندة
بين حلمة و حلمة... شرقات الإنسانية ظالمة و مسالمة
بين عيْن و عيْن... خْمَر سْفَر التكوين
و طال السْفَر
بر و بحر / خير و شر

و شارب الصبر .. يْبيّض علامو
و بيّاع الجْمر.. يعوّر سلامو
و حاضن السّر.. يسْرح احلامو

و رموش العمر
فاتحة عين // و مغمضة عين
تراوغ شهقات الدْهر.

×××××

علماتني الرموش نغمز
علّمني العمر نتّغمز
غلّفت عيني بألف لغز و لغز:

الثقاف1: مبدي بالحا(ء) و الحا(ء) ساكن فوق كدية محلاها
العين تحتو و عمرو شرب ماها

الثقاف2: مبدي بالشين و الشين نزاها
واتات الزين و واتاها

الثقاف3: مبدي بالميم و الميم معانق الوانو
يسحر العاقلين.. و السّر فْ احضانو
(...)
×××××

تْعرِّيت مرايا فْ وجه الكون
نحفر/ ننبش، أنا أش نكون؟

حاجب عالي/ أو حاجب منتوف
رمش غالي/ أو رمش مخطوف
النور يحلالي/ أو بالظلام نشوف

تعريت مرايا فْ وجه الكون
تعرا الكون جوج(2) مرايات
نكحّل بهم جوج عوينات:

"عين الغول" ما عطاتني الطوع.. لصقات وجهي ف المرايا.. كحلات قلبي حدايا.. و خاصمات الشمس معايا.
و "عين السما" عطيتها الطوع.. كحلات عيني ف المرايا.. رضعات قلبي ف جوايا.. لقيت النجوم حدايا گارة.. و شرقات عينيا نوّارة.يونس تهوش
فاس: يوليوز 2011